Türkmen halky gadym döwürlerden bäri at goýmak däbine uly hormat bilen garapdyr. Adamyň ady onuň şahsyýetini alamatlandyrýan ilkinji gymmatlyk hasaplanylýar. Şonuň üçin hem çagalara manyly, owadan we ýagşy arzuwlary özünde jemleýän atlar dakylýar. Garaşsyzlyk ýyllarynda ýurdumyzda her ýyla aýratyn many-mazmunly at dakylmagy asylly däbe öwrüldi. Ýylyň ady diňe bir senenama ýylyny alamatlandyrman, eýsem döwletimiziň ösüşiniň esasy ugurlaryny, halkymyzyň milli gymmatlyklaryny we jemgyýetimiziň öňünde duran möhüm wezipeleri beýan edýär.
Türkmenistanyň her ýylynyň ady halkyň bähbitlerine gönükdirilen döwlet syýasatynyň möhüm ugurlaryny şöhlelendirýär. Ýylyň dowamynda şol ada laýyklykda ylmy-amaly maslahatlar, medeni-köpçülikleýin çäreler, döredijilik bäsleşikleri, sergiler, sport ýaryşlary we wagyz-nesihat duşuşyklary geçirilýär. Bu çäreler ýaşlarda watançylyk, agzybirlik, zähmetsöýerlik, ynsanperwerlik we milli däplere hormat goýmak ýaly asylly häsiýetleri ösdürmäge ýardam berýär.
Ýylyň ady jemgyýetiň ähli ugurlarynda giňden ulanylýar. Ol döwlet maksatnamalarynda, okuw kitaplarynda, gazet-žurnallarda, teleýaýlymlarda we medeni çärelere degişli çykyşlarda öz beýanyny tapýar. Şeýlelikde, ýylyň ady jemgyýetçilik durmuşynyň aýrylmaz bölegine öwrülýär.
Ýylyň ady bilen baglanyşykly geçirilýän çäreler hem ýaş nesliň milli ruhda terbiýelenmegine uly goşant goşýar. Okuw mekdeplerinde geçirilýän açyk sapaklar, düzme bäsleşikleri, döredijilik agşamlary we maslahatlar okuwçylaryň Watana bolan söýgüsini, milli gymmatlyklara hormatyny we döredijilik ukyplaryny ösdürýär.
Türkmenistanyň her ýylyna dakylýan atlar halkymyzyň ruhy dünýäsini, milli gymmatlyklaryny we döwletimiziň ösüş maksatlaryny şöhlelendirýär. Ýylyň ady bilen baglanyşykly atlar bolsa ene-atalaryň ýagşy arzuwlarynyň, halkymyzyň milli däpleriniň we döwrüň ruhunyň aýdyň beýany bolup durýar. Şeýle atlar diňe bir adamy tanatmak üçin däl, eýsem onuň bagtly geljegine bolan ynamy we ýagşy dilegleri beýan etmek üçin hem möhüm ähmiýete eýedir.
Şonuň üçin ýylyň adyna hormat goýmak, onuň many-mazmunyny çuňňur öwrenmek we ýaş nesle düşündirmek her bir raýatyň möhüm borçlarynyň biridir. Bu bolsa Watanymyzyň mundan beýläk-de gülläp ösmegine, halkymyzyň agzybirliginiň berkemegine we milli däplerimiziň dowam etdirilmegine öz goşandyny goşýar.
Her bir raýatyň janynyň, at-abraýynyň, mertebesiniň we azatlygynyň, şahsy eldegrilmesizliginiň tebigy we mizemez hukuklarynyň goralmagy ugrunda giň gerimli işleri alyp barýan Gahryman Arkadagymyzyň, hormatly Prezidentimiziň janlary sag bolsun, ömürleri uzak bolsun, il-ýurt bähbitli işleri hemişe rowaç bolsun.
Baýram Hojamyradow,
TKAMM-yň KA-nyň agzalarynyň durmuş-zähmet
hukuklaryny goramak boýunça hukuk gözegçisi.
