Gahryman Arkadagymyzyň aýdyň ýol ýörelgelerini mynasyp dowam etdirýän Hormatly Prezidentimiz Arkadagly Gahryman Serdarymyzyň parasatly ýolbaşçylygynda «Garaşsyz, baky Bitarap Türkmenistan – bedew batly at-myradyň mekany» ýylynda ýurdumyzda milli ykdysadyýetimiziň ähli ugurlary bilen bir hatarda atçylyk pudagynda hem ýokary zähmet üstünlikleri gazanylýar. Türkmen halkynyň milli buýsanjy, uçar ganaty bolan gamyş-gulak behişdi bedewlerimiziň dünýädäki at-abraýy, şan şöhraty barha beýgelýär.
Golaýda Türkmenistanyň Agrosenagat işgärleriniň kärdeşler arkalaşygynyň Geňeşiniň işgärleriniň we pudaga degişli kärdeşler arkalaşygynyň ilkinji guramalarynyň işjeň agzalarynyň gatnaşmaklarynda ýurdumyzyň atçylyk pudagynda gazanylan üstünlikleri hem-de Niderlandlar Patyşalygynyň Kronenberg şäherinde ahalteke atlarynyň arasynda atly sport we gözellik bäsleşiginiň dünýä çempionatyna taýýarlyk görmek boýunça amala aşyrylýan işler barada «Bedew, türkmeniň uçar ganaty» ady bilen tegelek stoluň başynda söhbetli gepleşik guraldy. Söhbetli gepleşikde çykyş edenler türkmen halkynyň Milli Lideri, Gahryman Arkadagymyzyň hem-de hormatly Prezidentimiz, Arkadagly Gahryman Serdarymyzyň taýsyz tagallalary bilen ýurdumyzda atçylyk pudagyny ösdürmekde durmuşa geçirilýän beýik işler, pudagyň maddy enjamlaýyn binýadyny pugtalandyrmakda, arassa ganly behişdi bedewlerimiziň baş sanyny köpeltmek we olaryň şan şöhratyny dünýä tanatmak boýunça durmuşa geçirilýän nusgalyk işler barada buýsanç bilen belläp geçdiler.
Ýurdumyzyň ähli ýerlerinde döwrebap atçylyk toplumlarynyň, açyk we ýapyk manežleriň, aýlawlaryň, ýörite atçylyk ugry boýunça halkara derejesindäki hünärmenleri taýýarlaýan Arkadag şäherindäki Aba Annaýew adyndaky Halkara atçylyk akademiýasynyň açylmagy, ylmy önümçilik merkezleriň gurulyp ulanylmaga berilmegi bolsa pudagyň has-da ösmegine we şan şöhratynyň dünýä dolmagyna getirdi. Munuň şeýledigine şu ýylyň başyndan bäri «Galkynyş» milli at üstündäki oýunlar toparynyň dünýäniň dürli döwletlerinde Özbegistanda, Azerbaýjanda, Türkiýede Amerikanyň Birleşen Ştatlarynda, Hytaý Halk Respublikasynda, Beýik Britaniýada, RF-nyň Tatarystan Respublikasynda atlar we atçylyk sungaty bilen bagly ahalteke bedewlerine bagyşlanyp geçirilen halkara festiwallara, maslahatlara, çempionatlara, gözellik bäsleşiklerine gatnaşyp, görkezen ýokary ussatlyklary bolsa türkmen bedewleriniň şan-şöhratynyň dünýä dolýandygyna ýenede bir gezek şaýatlyk edýär.
Häzirki döwürde Hormatly Prezidentimiziň Kararyna laýyklykda sentýabryň başyna Niderlandlar Patyşalygynda ahalteke atlarynyň arasynda geçiriljek atly sport we gözellik bäsleşiginiň dünýä çempionatyna ýokary wekilçilikli toparyň gatnaşmagyna taýýarlyk işleri görmek üçin guramaçylyk topary döredilip geçiriljek çärelere ýokary derejede taýýarlyk işleri görülýär. Guramaçylyk
toparyň başlygy Gahryman Arkadagymyz bu ugurda ýaýbaňlandyrylan giň gerimli guramaçylyk işlerini yzygiderli gözegçilikde saklap özüniň gymmatly maslahatlaryny berýär. Ýakynda Gahryman Arkadagymyz «Galkynyş» milli at üstündäki oýunlar toparynyň agzalary bilen duşuşyp, olaryň okuw-türgenleşikleri we durmuşy bilen içgin gyzyklanyp şu ýylyň sentýabr aýynda Niderlandlar Patyşalygynda geçiriljek halkara ýaryşlarynda şowly çykyş etmeklerine ak pata berdi.
Berdimyrat Rozyýew
Türkmenistanyň Agrosenagat işgärleriniň
kärdeşler arkalaşygynyň Geňeşiniň başlygy
