Türkmenistanyň Agrosenagat işgärleriniň kärdeşler arkalaşygynyň Geňeşiniň guramagynda, pudagyň Aşgabat şäherindäki edara-kärhanalaryndan kärdeşler arkalaşygynyň işjeň agzalarynyň gatnaşmagynda Türkmenistanyň Garaşsyzlygynyň 35 ýyllygyna bagyşlanan dabaraly çäre geçirildi.
Türkmenistanyň Garaşsyzlygynyň şanly 35 ýyllygy mynasybetli «Dünýä dolup bagtyýarlyk mukamy, toý toýlaýar Garaşsyzlyk mekany» diýen şygar astynda geçirilen çäre 2026-njy ýylyň 11-nji sentýabrynda Türkmenistanyň Daşky gurşawy goramak ministrliginiň Gidrometeorologiýa baradaky gullugynyň mejlisler jaýynda guraldy.
Çäräniň dowamynda Gahryman Arkadagymyzyň ýolbaşçylygynda 2026-njy ýylyň 4–6-njy sentýabry aralygynda Niderlandlar Patyşalygynyň Kronenberg şäherinde ahalteke atlarynyň arasynda geçirilen atly sport we gözellik bäsleşiginiň dünýä çempionatynda türkmen halkynyň milli buýsanjyna öwrülen ahalteke bedewleriniň gazanan üstünlikleri barada giňişleýin gürrüň edildi.
Şeýle hem dünýä çempionatynyň çäklerinde geçirilen ugurdaş çäreleriň ähmiýeti, olaryň milli atşynaslyk sungatyny dünýä derejesinde wagyz etmekdäki orny barada pikir alşyldy. Ahalteke bedewleriniň gözelligi, çeýeligi, çydamlylygy we özboluşly aýratynlyklary barada täsirli çykyşlar edildi.
Dabarada Türkmenistanyň Garaşsyzlygynyň ýyllary içinde ýurdumyzyň ähli ugurlarda gazanan üstünlikleri, halkymyzyň bagtyýar we abadan durmuşyny üpjün etmekde alnyp barylýan giň gerimli işler barada hem bellenildi. Garaşsyz döwletimiziň halkara abraýynyň barha belende galýandygy, milli gymmatlyklarymyzyň we däp-dessurlarymyzyň dünýäde giňden tanalýandygy aýratyn nygtaldy.
Baýram HOJAMYRADOW
Türkmenistanyň Agrosenagat işgärleriniň kärdeşler arkalaşygynyň Geňeşiniň hukuk gözegçisi
