Golaýda Birleşen Milletler Guramasynyň Nýu-Ýork şäherindäki ştab-kwartirasyndan hoş habar gelip gowuşdy.
Hormatly Prezidentimiz 2025-nji ýylyň sentýabrynda Birleşen Milletler Guramasynyň Baş Assambleýasynyň 80-nji ýubileý sessiýasynyň plenar mejlisinde 2028-nji ýyly “Halkara hukuk ýyly” diýip yglan etmegi teklip edipdi. Arkadagly Gahryman Serdarymyzyň ýurdumyzyň adyndan beýan eden bu möhüm teklibi biragyzdan goldanyldy.
Resminama şu ýylyň 24-nji iýulynda Birleşen Milletler Guramasynyň Baş Assambleýasynyň 80-nji sessiýasynyň 106-njy plenar mejlisinde kabul edildi.
Kararnamanyň düzgünlerini ýerine ýetirmek, ýurdumyzyň halkara hukugy çygryndaky başlangyçlaryny açyp görkezmek bilen baglylykda, Arkadagly Gahryman Serdarymyzyň garamagyna birnäçe teklipler hödürlenildi. Olaryň hatarynda 2028-nji ýylda Halkara hukuk ýylyny ýokary guramaçylyk derejesinde geçirmek, 2026-2028-nji ýyllar üçin Hereketleriň milli meýilnamasynyň taslamasyny taýýarlamak göz öňünde tutuldy.
Jemgyýetçilik guramalarynyň merkezi binasynda Türkmenistanyň Halk Maslahatynyň, Türkmenistanyň Mejlisiniň hem-de Türkmenistanyň Jemgyýetçilik guramalarynyň bilelikde gurnamagynda “2028-nji ýyl – Halkara hukuk ýyly: parahatçylygyň we agzybirligiň dabaralanmagy” atly maslahat geçirildi. Onda ýurdumyzyň ählumumy parahatçylygyň, durnukly ösüşiň berkidilmegine gönükdirilen başlangyçlaryny giňden wagyz etmek bilen baglanyşykly meseleleriň ähmiýeti maslahatlaşyldy.
2026-njy ýylyň awgust aýynyň 6-na Jemgyýetçilik guramalarynyň merkezi binasynda Türkmenistanyň Medeniýet, sport, syýahatçylyk we jemgyýetçilik guramalarynyň işgärleriniň kärdeşler arkalaşygynyň Geňeşiniň işgärleri we pudaga degişli işjeň agzalarynyň gatnaşmagynda “2028-nji ýyl – Halkara hukuk ýyly” diýip yglan edilmegi mynasybetli “Halkara hukugynyň ýörelgeleri – parahatçylygyň esasy sütüni” atly söhbetdeşligi geçirildi.
Ogulşat Geldiýewa, Türkmenistanyň Medeniýet, sport, syýahatçylyk we jemgyýetçilik guramalarynyň işgärleriniň kärdeşler arkalaşygynyň Geňeşiniň hukuk gözegçisi
